呃細路

今早上班時經過小公園, 一隻黑色的蝴蝶在面前近距離掠過, 忙亂走避之際(我怕昆蟲), 忽然勾起腦中埋藏已久, 關於蝴蝶的記憶.

話說小時候經常跟隨爸媽哥姐到郊外遊玩, 燒烤之類. 每次見到蝴蝶, 老豆必然會說: '咪行埋去呀! 比蝴蝶d粉入左眼會盲架!' 於是我的童年便在蝴蝶的陰影下過, 每次見到蝴蝶都極為恐慌地走避, 有時或會閉上眼以避免被弄盲...

長大之後, 當然知道了蝴蝶的'粉'其實是'鱗片', 而且並不會無端脫落. 這種 '呃細路' 式的謬誤, 雖是無傷大雅, 但想起來還是覺得自己被老點.

其他類似的老點亦包括:
> 誤吞香口膠,會黐住腸臟, 死人架! (攪到我每次食香口膠都提心吊膽)
> 誤吞果核會在頭頂生樹 (呢個只呃到3歲以下細路)
> 被蜜蜂或黃蜂'嬲'時要站著不動 (我試過, 唔郁隻野係唔會走的!)
> 成日唔食魚, 生大頸泡呀! (但我有食魚肝油喎...)
> 挖鼻孔會越挖越大 (這個有待証實)
> 巴士或地鐵上坐人地個'熱位'(尚有餘溫的位子)會生痔瘡...

不過, 我懷疑這些呃細路的謬誤, 隨著現在資訊的發達和DNA奶粉的功效, 家陣細路個個串到暈, 已經很難再'老點'他們了罷.