敢死隊

上星期與阿姐阿太等開會, 討論工作進度.

現時總共有27個 project 要跟, 單單在我手上已經有20份. 本來都沒有所謂, 反正都做慣哂. 其實都完成得七七八八, 但在政府做事, 有超過70%的時間是在等老細 approval. 如果 '等待是一生中最早的蒼老' , 那麼個個在政府做事的人都必定係人瑞.

第三批共14個 project 又黎料, 阿姐竟然同我講要我跟哂, 然後又話趕二月至三月間攪掂哂佢. 本來都可以 '係係係' 算數, 但今次實在忍唔住要出聲. 妖, 第一, 二批果27個都未攪掂, 趕乜叉第三批啊? 而且又比哂我? 咁我咪要跟三十幾個 project? 咁你請阿佬返來做乜? 我 '不留情面' 地向阿姐說: '我 priority 係手頭上第一批及第二批的 project. '

然後是半秒的 dead air.

死火, 咁講似乎好似唔係咁好喎(汗)...於是我補充 '當然第三批都會同步做啦...' 這時候阿太亦識相加入: ' 阿xxx(阿佬) 手頭上的工作都七七八八, 可以幫手的'. 哈! 比我成功拉埋阿佬落水, 唔係咩!

事後阿佬講笑話我夠 '型' (或者叫stupid), 竟然膽敢直接頂撞老闆. 大佬, 唔頂佢, 我要咩多14 個 project 喎! 話之佢特首都咁話啦...... (睇我幾時比人炒)